प्रतिनिधि सभा निर्वाचनका लागि मतपत्र छपाइ आज सकिँदै

The Kalika Online

27 Feb 2026

# News

प्रतिनिधि सभा निर्वाचनका लागि मतपत्र छपाइ कार्य अन्तिम चरणमा पुगेको छ। जनक शिक्षा सामग्री केन्द्र लिमिटेडले आज दिनभरमै सबै मतपत्र छपाइ सम्पन्न हुने जनाएको छ।

केन्द्रका कार्यकारी प्रबन्ध सञ्चालक **यदुनाथ पौडेल**का अनुसार हाल पाँच लाख मतपत्र मात्र छाप्न बाँकी रहेको छ, जसअन्तर्गत बागमती प्रदेशका मतपत्र रहेका छन्। ती सबै आजै छापिसक्ने तयारी रहेको उनले बताए। उनका अनुसार प्रत्यक्षतर्फ कुल दुई करोड तीन लाख मतपत्र छपाइ गर्नुपर्नेमा अब अन्तिम चरणमा पुगेको छ। ‘४२ दिनको कार्यतालिका लिएर छपाइ सुरु गरेका थियौं, तर ४० दिनमै काम सकिँदैछ,’ उनले भने।

छपाइ सकिएपछि मतपत्र प्याकिङ गरी बाँकी जिल्लाहरूमा ढुवानी गरिने जानकारी पनि उनले दिए।

केन्द्रले दैनिक १३ देखि १५ लाखसम्म मतपत्र छपाइ गर्दै लक्ष्यभन्दा अगाडि नै काम सम्पन्न गरेको जनाएको छ। यसअघि छपाइ गरिएका १० लाख नमूना मतपत्र भने **निर्वाचन आयोग**ले विभिन्न स्थानमा वितरण गरिसकेको छ। त्यसैगरी, समानुपातिकतर्फ दुई करोड आठ लाख ३० हजार मतपत्र छपाइ गरी प्याकिङ सम्पन्न भइसकेको र ती जिल्ला जिल्लामा पठाउने काम भइरहेको केन्द्रले जनाएको छ।

प्रबन्ध सञ्चालक पौडेलका अनुसार कर्णाली र सुदूरपश्चिम प्रदेशमा सबै मतपत्र पुगिसकेको छ भने बाँकी क्षेत्रहरूमा पनि फागुन १२ गतेसम्म पुर्याउने लक्ष्यका साथ काम भइरहेको छ।